El maestru Óliver Díaz va dirixir el programa esti 28 de setiembre nel Auditoriu Príncipe Felipe
Les entraes puen retirase a partir de mañana na web www.ospa.es y na taquilla del Teatru Campoamor
La Orquesta Sinfónica del Principáu d’Asturies celebra la 41 Selmana de les Lletres Asturianes con obres representatives del patrimoniu sinfónicu d’Asturies. Escrites por compositores nacíos o vinculaos a Asturies, estes composiciones tienen, en distintu grau, una traza común: la presencia de la música popular, sobre manera del cantar tradicional asturianu. El Conciertu de les Lletres Asturianes va dirixilu’l maestru Óliver Díaz esti 28 de setiembre nel Auditoriu Príncipe Felipe (Uviéu), a les 20:00 hores.
El programa, centráu na cultura y na música del Principáu, inclúi obres de los compositores Facundo de la Viña, Benito Lauret, Julián Orbón y Jorge Muñiz. El programa ye’l siguiente:
- Facundo de la Viña, Covadonga
- Julián Orbón, Tres versiones sinfónicas
- Jorge Muñiz, Asturias desde la distancia
- Benito Lauret, Escenas asturianas
En Covadonga y Escenas asturianas el datu folclóricu directu ye’l fundamentu d’estes composiciones. D’una manera más astracta, atópase la evocación popular asturiana na segunda de les Tres versiones sinfónicas y n’Asturias desde la distancia.
Pues lleer les notes al programa nesti enllaz: www.ospa.es.
Les invitaciones pa esti conciertu puen retirase dende mañana na web www.ospa.es y na taquilla del Teatru Campoamor.
Cumpliendo la normativa de seguranza vixente, l’aforu d’esti conciertu va tar menguáu pa caltener la distancia social.
